شیخ علي طنطاوي رحمه الله لیکي، چی الله به زما سره مینه لري که نه؟!

همدا پوښتنه مې فکر ته راغله، رایاد شول چې الله د معلومو صفاتو او غوره خویونو پر اساس د انسان سره مینه کوي او هغه صفتونه یې په قرآن کې ذکر کړي دي. د قرآن هغه ځایونه مې په ذهن کې راړول پیل کړل ترڅو معلومه کړم چې په ما کې له هغو نه کوم صفت شته که یا؟ او هغه ځايونه دا دي:

لومړی ـ الله د « متقیانو » سره مینه لري؛ دومره جرئت نه شم کولی چې ځان « متقي » وګڼم!

دوهم ـ الله د « صابرینو » سره مینه لري؛ نو خپلې بې صبرۍ ته خپه شوم!

درېیم ـ الله د « مجاهدينو » سره مینه لري؛ دلته خپلي سُستۍ او کمزورۍ ته خپه شوم!

څلورم ـ الله د « نېکي کوونکو » سره مینه لري؛ له دې نه هم ځان لرې راته ښکاره شو!

د قرآن پلټنه می ودروله ، ما ویل داسې هیڅ صفت به په ځان کی پیدا نه کړم چې له امله یې الله مینه راسره ولري. خپلو عملونو ته چې مې وکتل ، اکثره یې په ټنبلي، شکونو او ګناهونو لړلي وو. نو دا آیت مې ذهن ته راغی: إنّ الله يحب التوابين؛ یعنې بې شکه الله له توبه ګارو سره مینه کوي. خوشاله شوم، د ځان سره مې وویل: زما او زما په رقم خلکو له پاره خو همدا آیت دی، نو دلته مې په استغفار او توبو خوله خلاصه کړه:

أستغفر الله و أتوب إليه ! 

أستغفر الله و أتوب إليه ! 

 أستغفر الله و أتوب إليه !

هو درنو لوستونکو همدا میاشت، خصوصأ همدا وروستۍ لسیزه د سمون او توبې بهترین چانس دی. بس یوه پاکه اراده او فیصله غواړي.